Le moulin haut - 1454
 |
1454 21 --bre acquit par li sire Nicolle Dex chanoine de la grant esglise de Metz le mollin de Wappey halt |
Transcription : René Mognon, de la Société d'Histoire de Woippy.
Connue chose soit à tous, que le sire Nicolle Dex, chanoine de la grant esglise de Mets pour son treffons ait acquasteit en treffons à tous jours maix à Melline femme Jehan
Clowellat de Waippey que fut pour son dowaire qu’elle ait et doit tenir de part ledit Jehan son mairit que fut à Jennette fille dudit Jehan Clowellat et femme Dediet
Callat le lenier que maint à Waippey par son crant et à Jehan Despilley que maint à Waippey et à Collatte sa suer les II anfans Jehan Despilley le lenier que manoit
à Weppey qu’il olt de Roienette sa femme que fut, fille dudit Jehan Clowellat que fut et à Maiensson femme Philippe filz dudit Jehan Clowellat que fut tant pour son dowaire
comme pour le treffons de Jehan et de Michiel lez II anffans de ladite Maiensson qu’elle ait dudit Philippe son mairit que fut que sont josne et desoubzaige lesqueilx
ladite Maiensson, ladite Jennette, sondit mairit, ledit Jehan et sadite suer se font fort en cestuit cais et que se font ausy fort en cestuit cais de Didiet filz dudit Jehan
Clowellat à présent obsant du pan et à chacun pour le tout, le mollin mollant que ciet à Waippey, le gerdinet daier ledit mollin et le foullon encosté et encor tous l’uzewaire que
audit mollin appant et apartient, devant, daier et encosté. Et tous lez preiz que vont dez ledit mollin et en jusque au fousseiz du grant prey. Et la close teille
comme elle est d’ancienneteit et l’uzewaire qui appant à ladite close exceptez les saulf que vont sur le grant prey desoubz la close ; lequelx mollin dessusdit avec ceu qui
appant le sire Nicolle Lohier l’eschevin laiet à cens par escript d’airche audit Jehan Clowellat parmey plussieurs conditions dite et spécifié en l’escript de ladite laiee et encor parmey VII
librez et de cens que ledit Jehan l’en dobvoit chaque an paier à Noël et à la Saint Jehan, ensi comme li escript de ladite laiee à cens que gist en l’airche Perrin Dendeney de l’airche
que fut Martin Travalt l’anney, amant de Saint Girgonne plus plennement ledist. Et ce ceste acquast ley ait ledit sieur Nicolle fait boin paiement. Et ceste acquast li doient
lidite Melline pour sondit dowaire et tuit li autres aprez ley nommés et nommée tant pour eulx comme euls faixant fort pour lesdits II anffans de ladite Maiensson et aucy dudit
Dediet à présent obsant pour lor treffons wairantir à tous jour maix se aulx ne ledit Jehan Clowellat l’avoient en millieu aillour emcombreif pour eulx emchief chacun et chacune pour le
tout parmey les dessusdites VII librez de cens que ledit mollin doit chaque an. Et veullent ancor bien ladite Jennatte et cezdits consors aprez ley nommeis et nommée eulx faixant fort comme dessus
que ledit sieur Nicolle ou autre pour lui se face et se puise aider de l’escript de ladite laiee à cens et de la wairantixe que faire s’en dobvoit audit Jehan Clowellat et de tout ceu
enthierement dont aidier se poient tout on point et on droit en la forme et en la manière comme ledit Jehan Clowellat meysme à son vivant et eulx meysme à présent s’en poioient et debvoient
aidier devant cestuit présent vandaige et acquast fait. Et ceste crant et vendaige et tout ceu dessusdit ont encor ladite Jennette et ladite Maiensson fait et cranteit c’est assavoir
ladite Jennette par le crant et par la vollenteit dudit Didiet son mairit, et encor par le loz et par le tesmoingnaige de cez covenable parans et amis et des covenable
parans et amis audit II anfans de ladite Maiensson de part peire et de part meire. C’est assavoir dez amis de ladite Jennette de part son peire de Jacomin Grayvel le corthyier de chevalz
demourant en Remport et de Aillix femme Michiel Degerney par le crant dudit Michiel son mairit. Et de part sa meire de Dediet Mullaiz de Lessy et de Richair Mullaiz
de Lessey. Et dez amis audits II anfans de ladite Maiensson de part lor peire de Didiet Mullaiz de Lesszy et de Rechair Mullaiz de ladite Lessey. Et de part leur mère de
Dediet Hairant de Salney et de Pieron de ladite Salney son frère les II filz le petit Hairant de Noweroy que fut, que tuit dient et tesmoingne qu’il y virent le bien et le proulx
de ladite Jennette et de sesdits II anffans et que cestuit vandaige li ait elle convenus faire besonnablement pour besoing et necesiteit qu’ellez avoient de vivre
et pour lour aultre héritage à retenir que se perdoit et alloit à ruyne, cellez n’eust cestuidit vandaige et acquast fait. Cist escript fuit fait le XXIe jour don moix de ceptambre quant il ot a milliaire mil IIIIc et LIIII ans.
Hanry de Gorse l’escript.
Comme chose soit à tous que comme il soit ensy que ly Nicolle Dex chanoine de la grant esglixe de Metz pour son treffons sy ait acquasteit par escript d’airche en treffons à tous jour
maix à Melline femme Jehan Clowellat de Weppey que fuit pour son dowaire qu’elle ait et doit tenir de part ledit Jehan son mairit qui fuit à Jennette fille dudit Jehan
Clowellat et femme Dediet Collat le lenier que maint à Waippey par son crant à Jehan Despilley que maint à Waippey et à Collatte sa suer les II anffans Jehan Despilley
le lenier que manoit à Weppey qu’il olt de Roienatte sa femme que fut, fille dudit Jehan Clowellat que fut et a Maiensson femme Philippe fils dudit Jehan Clowellat que fut
tant pour son dowaire comme pour le treffons de Jehan et de Michiel les II anfans de ladite Maiensson qu’elle ait dudit Philippe son mairit que fut que sont josne et desoubz
aigez et desqueilx ladite Maiensson, ladite Jennette sondit mairit, ledit Jehan et sadite suer sont fait fort en cestuit cais et que se font aucy fort en cestuit cais de Dediet filz
dudit Jehan Clowellat à présent obsans du pays et à chacun pour le tout le mollin mollant que ciet à Waippy le gerdinet daier ledit mollin et le foullant encosté et tout
l’uzewaire que audit mollin appant et appartient devant daier et encosté et tout les preis que vont des ledit mollin et en jusquez az fousseiz du grant preiz et la close
telle comme elle est d’ancienneteit et l’uzowaire qui appant à ladite close parmey certain cens que ledit héritaige doit chaque an enci comme li escript dondit acquast que gist en
l’airche Hanry de Gorse ledist, assavoir est que lidite Jennette par le crant dudit Didiet son mairit et ledit Dediet meysme et ledit Jehan et Collatte sa suer et ladite Maiensson ont
cranteit et crantent par ceste présent escript que tantost que lesdits Jehan et Michiel anfans de ladite Maiensson que sont josne et desoubz aigez et de cui il sont fait fort comme dit
est averont aige et entendement de crant faire et ausy tantost que ledit Dediet filz dudit Jehan Clowellat serait revenus au pans ladite Jennette par le crant dudit Dediet
son mairit et ledit Dediet meysme et cesdits consors lor doient faire et feront cranteit et agréer le devandit acquast et vandaige et le faire cranteit de wairanter cil l’avoient
en millieu aillour emcombrief pour eulx emchief, et pour le faire par la manière dessusdite en mettent lidite Jennette par le crant dudit Dediet son mairit et ledit Dediet
meysme et cesdits consors en waige quant qu’il ont en tous uz chacun pour le tout. Et ceste crant et tout ceu dessusdit ait ladite Jennette et ladite Maiensson fait et cranteit.
C’est assavoir ladite Jennette par le crant et par la vollenteit dudit Dediet son mairit et ancor par le loz et par les tesmoingnaige de cez convenable parans et amis et des convena
ble parans et amis audit II anfans de ladite Maiensson de part peire et de part meire c’est assavoir des amis à ladite Jennette de part son peire de Jaicomin Grayuel
le corthier de chevalz demeurant en Remport et de Aillix femme Michiel Degerney par le crant et par la vollonteit dudit Michiel son mairit et de part sa meire
de Dediet Mulaz de Lessey et de Richair Mulaz de ladite Lessey, et des amis audits II anffans de ladite Maiensson de part leur peire de Dediet Mulaz de Lessey et de Richair
Mullaz de ladite Lessey. Et depart lor meire Hairant de Salney et de Pieron de ladite Salney son frère lez II fil le petit Hairant de Moweroy que fut que tuit dient
Et tesmoingnent qu’il y virent le bien et le proulx de ladite Jennette et desdits II anffans. Ciste script fut fait le XXIe jour don moix de ceptambre quant il olt a milliaire mil IIIIct et LIIII ans.
Hanry de Gorse l’escript